It Fryske Boek

Salsafamke

Hanneke de Jong

Freya, in famke fan fjirtjin jier is mei har âlden en in jonger broerke op fakânsje op Curacao. Har âldere broer Roelof rint dêr staazje, sadwaande. De measte dagen leit de famylje wat neist it swimbad fan harren djoere hotel. Sa út en troch wurdt ris wat ûndernaam, mar folle stelt it net foar. Freya krijt kontakt mei Guido, in freon fan Roelof. Tegearre geane se elke jûn nei it Salsadûnsjen ta, bûtendoar by it hotel. It giet Freya hieltyd makliker ôf, se rekket alhiel ûnder de tsjoen fan it salsa-dûnsjen. Mar dêr net allinne fan, ek fan de geweldige fint dêr’t se Guido foar oan sjocht. Hoewol’t Roelof syn suske in pear kear warskôge hat  foar it ladykiller-gehalte fan Guido en ek Guido warskôge is om it net te lappen om wat mei syn suske te begjinnen, is Freya net te hâlden. De gefolgen litte har riede.
Ien kear werom yn ’t heitelân komt se der achter dat se swanger is. Se hat in mem dy’t ‘alles’ altyd bepraat mei har freondinnen en in heit dy’t noch te bot ynkapsele sit yn it ferlies fan syn heit, Freya har pake. Geskikte freondinnen om it oan te fertellen hat se ek net. As se har heil by beppe siket, blykt dit in gouden greep te wêzen. Beppe is der hielendal foar har en tegearre fine se in oplossing.
Hoe’t it letter dochs bepraat wurdt yn it húslik fermidden en hoe’t har freondinnen ek mei blike te fallen, wurdt moai dosearre. In ferhaal alhiel fan dizze tiid. Ast hjir yn begjinst te lezen, wolst it sa gau mooglik út ha omdatst poerbenijd bist, hoe’t dit beteare sil.

Wieke de Haan