It Fryske Boek

Alde spoaren is Douwe Kootstra syn fjirde boek mei reisferhalen. Hy docht dêryn ferslach fan in lange reis troch Vietnam. Kootstra beskriuwt hoe’t dit prachtige lân him stadichoan ûntwrakselet oan in ferline fol oerhearsking en oarloch. Fierder folget er kuierjend in Romeinse hearwei yn East-Ingelân, de Peddars Way. Hy dwaalt oer in Europeesk tsjerkhôf yn Portugees Macao, dêr’t er bedarret fia dy oare nijsgjirrige eks-koloanje: Hong Kong. Yn Turkije klimt er nei de ruïnes fan de antike stêd Termessos, wylst er fan syn Ierske reis ûnder oaren it ferhaal fan in bysûndere pub meinimt. As dielnimmer oan de Colin Archer-sylrace fan Lauwerseach nei it Noarske Larvik ûnderfynt de skriuwer wat it libben op in stoarmeftige see ynhâldt. Alde spoaren slút ôf mei in ferhaal fan in besite oan de konsintraasjekampen Auschwitz en Bergen-Belsen. Douwe Kootstra is yn syn reisferhalen gauris op ‘e siik nei spoaren fan it ferline.