It Fryske Boek

De roman Hessel Ypma waard troch de skriuwer Paulus Akkerman beskôge as syn bêste boek. Haadpersoan Hessel Ypma is net sa'n aardige man, net immen om noflik mei op en út te gean. O heden nee. Hy is stoef en swijsum, in wrotter en wramer, en tagelyk in grutte ynklauwer, want jild is it iennichst foar Hessel Ypma dat telt yn syn bestean. It ferhaal is net (mear) fan dizze tiid, it is ek al in heale ieu lyn skreaun. Mar de Hessel Ypma's binne fan alle tiden: fûle, deune gjirremiten mei wa't jo eins begrutsjen hawwe moatte. Akkerman hat sokken in spegel foarhâlde wollen om sjen te litten wêr't it hinnegiet as it jild de minsken yn 'e macht kriget. Ferskynd yn de earste rige Fryske Klassiken.